Folketingi

Folketingi tassaavoq Danmarkimi inatsisartut. Folketingimi suliassat pingaarnerit tassaapput inatsisissanik siunnersuusiornerit, nunap inatsisissaanik akuersissuteqarnerit, Danmarkimi naalakkersuisut oqartussaassutsimik atuinerannik nakkutiginninnerit kiisalu naalagaaffiup ukiumoortumik aningaasatigut naatsorsuutaanik suliaqartarneq akuersissuteqartarnerlu (aningaasanut inatsit).

Eqqartuussiviit

Eqqartuussiviit Danmarkimi eqqartuussinissamut oqartussaaffeqarput. Tassani inuit ataasiakkaat nunap inatsisaanik unioqqutitsisimanersut aalajangersarneqartarput. Aammattaaq innuttaasut akornanni suliassat, illuatungeriillu marluk akornanni isumaqatigiinnginnerit aalajangiiffigisarpaat.

Qinersinerit taasinerillu

Folketingimi, kommunalbestyrelsini, nunap immikkoortuini siunnersuisoqatigiinni, Europa-Parlamentimilu kikkut qinigaassanersut qinersisartunit aalajangerneqartarput.

Danmarkimi Naalakkersuisut

Danmarkimi Naalakkersuisut ministereqarfitik aqqutigalugit Folketingimi inatsisit akuersissutigineqartut malillugit nunami aqutsisarput.

Inatsit tunngaviusoq

Inatsit tunngaviusoq tassaavoq Danmarkimi nunami naalakkersuinikkut aaqqissuussinerup imarisaa. Tassani ilaatigut nassuiarneqarpoq inuiaqatigiit naalakkersuinerisa aaqqissugaanerat, innuttaasut pisinnaatitaaffii pisussaaffiilu aamma oqartussaaffiit agguataarneqarnerat.

Naalagaaffeqatigiit

Savalimmiut Kalaallit Nunaallu Danmarkip kunngeqarfianut ilaapput, nunalli taakkua marluk ullumikkut annertuumik namminersortuupput susassaqarfinnilu amerlasuuni namminneq inatsisiliortuullutik.