Savalimmiut pillugu ataatsimiititaliap sulinera, suliassai akisussaaffiilu

Savalimmiut pillugu ataatsimiititaliap sulinerani oqaluuserisassat siammasissorujussuupput. Sammisat Savalimmiut Danmarkillu ataqatigiinnerannut attuumassusillit ataatsimiititaliami suliarineqartarput. Ass. inuussutissarsiornermut, avatangiisimut, peqqinnissamut inuiaqatigiinnilu pissutsinut tunngasut.

Ataatsimut isigalugu ataatsimiititaliap suliai pingaarnerit pingasunut immikkoortinneqarsinnaapput:

• Savalimmiut Danmarkillu akornanni inatsisit tunngaviusut atortinnerannut tunngasut (assersuutigalugu suliassanik tigusinissamut inatsit Savalimmiuni namminersornerullutik oqartussaqarneranik annertusaasoq)
• Susassaqarfiit ataasiakkaat, Savalimmiuni namminersornerullutik oqartussat tigusimanngisaat pillugit inatsisiliorneq
• Danskit naalagaaffiata Savalimmiunut tapiissutaat

Savalimmiuni pissutsit ataatsimiititaliamit aamma malinnaavigineqartarput - suliat EU-mut tunngasut kiisalu ass. arfanniarneq aalisarnerlu pillugit apeqqutit. Savalimmiut EU-mut ilaasortaanngillat, niueqatigiinnermulli aalisarnerlu pillugu EU-mut isumaqatigiissuteqarsimallutik.

Suliassat akisussaaffiillu marlunnut pingaarnernut immikkoortinneqarsinnaapput:

• Inatsisissatut aamma aalajangiinissamut siunnersuutit suliarineqarnerat, taakku soorunami ataatsimiititaliap susassaqarfiinut ilaapput
• Susassaqarfinni, Savalimmiuni namminersornerullutik oqartussaniit tiguneqanngitsuni ministerit aqutsinerannik nakkutilliineq

Paasisassarsiorluni angalanerit

Savalimmiut pillugu ataatsimiititaliamit paasisassarsiorluni angalanerni Savalimmiut orninneqarnerusarpoq. Angalanerit ilisimasanik isumassarsiorlunilu katersinernik imaqartarput, nalinginnaasumillu angalaneq ulluni sisamani sivisussuseqartarluni. Ataatsimiititaliamut siunertaanerusarpoq Savalimmiuni pissutsinik ilisimasaqarnerulernissaq.

Savalimmiut pillugu ataatsimiititaliap ministeriaqarfia

Statsministeriaqarfik tassaavoq Savalimmiut pillugu ataatsimiititaliap politikkikkut susassaqarfia.