Folketingi naalagaaffeqatigiinnerlu

Savalimmiut Kalaallit Nunaallu Danmarkip kunngeqarfianut ilaapput, nunalli taakkua marluk ullumikkut annertuumik namminersortuupput susassaqarfinnilu amerlasuuni namminneq inatsisiliortuullutik.

Større

Savalimmiut kalaallillu oqartussaasuisa susassaqarfiit amerlanersaat Danmarkimit tigunikuuaat. Susassaqarfinni taakkunani Savalimmiut Kalaallit Nunaallu immikkut inatsisiliornissamut aqutsinissamullu akisussaaffeqarput. Susassaqarfinni tiguneqanngitsuni inatsisiliornerit Folketingip suliarisarpai.

Savalimmiuni inatsisartut Lagtinget inatsisiliorsinnaatitaapput, naalakkersuisullu Landsstyret, susassaqarfinni Savalimmiuni namminersornerullutik oqartussat akisussaaffigisaanni inatsisinik atortitsisuullutik.

Kalaallit Nunaanni Inatsisartut inatsisiliorsinnaatitaapput, Naalakkersuisullu susassaqarfinni Kalaallit Nunaanni Namminersorlutik Oqartussat akisussaaffigisaanni inatsisinik atortitsisuullutik.

Susassaqarfinni Savalimmiut Kalaallit Nunaatalu tigusimasaanni Folketingi inatsisiliornermi peqataatinneqanngilaq.

Savalimmiuni namminersornerulluni oqartussaaneq pillugu Statsministeriap nittartagaani paasisaqarnerugit (danskisut) Kalaallit Nunaanni namminersorluni oqartussaaneq pillugu Statsministeriap nittartagaani paasisaqarnerugit (danskisut)

Folketingi susassaqarfinni arlalinni inatsisiliornissamut oqartussaaffeqarpoq

Politikkikkut susassaqarfinni amerlanerpaani Savalimmiuni Kalaallit Nunaannilu naalakkersuisut oqartussaaffeqaraluartut, inatsit tunngaviusumi immikkut aalajangersakkat pissutigalugit nunat taakku marluk arlalinnik tigusinnaanngisaqarput. Susassaqarfiit taakku ilaatigut ukuupput:

  • inatsit tunngaviusoq
  • innuttaassuseqarneq
  • Eqqartuussiviit Qullersaat
  • nunanut allanut, illersornissamut isumannaallisaanermullu politikki
  • aningaasat aamma aningaasaqarnermut politikki

Susassaqarfinni taakkunani Folketingi aamma danskit naalakkersuisui inatsisiliortuupput ingerlatsisuullutillu. Tassa imaappoq pineqartuni inatsit nutaaq atuutilersinneqassappat imaluunniit inatsit pioreersoq allanngortinneqassappat Folketingi inatsisiliortuusarpoq.

Savalimmiuni Kalaallit Nunaannilu oqartussat suleqatigalugit inatsisiliortoqartarpoq

Danskit naalakkersuisui Savalimmiunut Kalaallit Nunaannulluunniit tunngasunik inatsisissatut siunnersuutinik saqqummiussigaangata Savalimmiuni Kalaallit Nunaannilu oqartussat suleqatigalugit, amerlanertigullu piumasaqarnerisigut pisarpoq.

Savalimmiut Kalaallit Nunaallu pillugu inatsisiliorneq Folketingimut danskit naalakkersuisuinit saqqummiunneqartussaq pillugu Savalimmiut Kalaallit Nunaatalu naalakkersuisuisa oqaaseqarfigissavaat. Tamanna namminersorneruneq aamma namminersorneq pillugu inatsimmi kiisalu Kalaallit Nunaanni Savalimmiunilu suliassanik suliarinnittarneq pillugu ministereqarfiit malittarisassaanni allaqqavoq.

Aallaavittut danskit Naalakkersuisui Savalimmiunut Kalaallitt Nunaannulluunniit tunngasumik inatsisissatut siunnersuutit Folketingimi saqqummiutinnginnerini oqartussaasut isumaat utaqqineqassapput.

Inatsisissatut siunnersuutit Lagtingimi Inatsisartunilu isummerfigineqartarput

Savalimmiuni Kalaallit Nunaannilu inatsisartut tamarmik immikkut inatsisissatut siunnersuutit Folketingimi saqqummiunneqartussat suliarinissaannut suleriutsimik toqqaasimapput.

Naalakkersuisut imaluunniit Landsstyri danskit naalakkersuisuinut siunnersuut pillugu oqaaseqannginnerini, Lagtingimi imaluunniit Inatsisartuni suliarinninneq naammassineqareersimassaaq inatsisartullu inatsisissatut siunnersuummut akuersisimassallutik.

Inatsisiliornermi Savalimmiuni oqartussat peqataatinneqarnerat pillugu retsinformation.dk-mi (danskisut) paasisaqarnerugit Inatsisiliornermi Kalaallit Nunaanni oqartussat peqataatinneqarnerat pillugu retsinformation.dk-mi (danskisut) paasisaqarnerugit

Savalimmiuni ataatsimiititaliap aamma Kalaallit Nunaannut ataatsimiititaliap inatsisissatut siunnersuutit nalilersortarpaat

Ukiut tamaasa Folketingip ukiuata aallartinnerani Folketingi Savalimmiunut ataatsimiititaliamik Kalaallit Nunaannullu ataatsimiititaliamik pilersitsisarpoq.

Ataatsimiititaliat taakku marluk ilaatigut inatsisissatut siunnersuutinik Savalimmiunut Kalaallit Nunaannullu tunngasunik naalakkersuisut Folketingimut saqqummiussaannik suliassaqartinneqartarput.

Savalimmiuni ataatsimiititaliaq pillugu paasisaqarnerugit Kalaallit Nunaannut ataatsimiititaliaq pillugu paasisaqarnerugit