Folketingip iluani pissutsit Folketingip siulittaasoqarfiani suliarineqartarput, soorlu Folketingip inersuani ataatsimiinnerit aqunneqarnerat, Folketingip aqutsisoqarfia ingerlatsineralu kiisalu Folketingimi pisortatigoortumik sinniisoqarneq. Folketingip siulittaasuata aalajangiinerit naggasertarpai, siulittaasummi tullersortaa annermik siunnersuisutut atorfeqarpoq, siulittaasoqarfilli  atorfeqarnermik ingerlatsisuuvoq.

Siulittaasoqarfik ukiumut ataatsimut qinerneqartarpoq.

Siulittaasoqarfiup katitigaanera

Folketingimi siulittaasoq Folketingimi amerlanerussuteqartunit qinerneqartarpoq, siulittaasullu tullersortaattut atorfiit sisamat partiinit annerpaanit sisamanit, siulittaasutut atorfeqanngitsunit inuttalerneqartarlutik.

Siulittaasoqarfik Folketingimi ilaasortanik ukuninnga inuttaqarpoq:

• Siulittaasoq Søren Gade (V)
• Siulittaasup tullia siulleq Leif Lahn Jensen (S)
• Siulittaasup tulliata aappaa Karina Adsbøl (DD)
• Siulittaasup tulliata pingajuat Karsten Hønge (SF)
• Siulittaasup tulliata sisamaat Lars-Kristian Brask (LA)

Siulittaasoqarfimmi allaffimmiut

Siulittaasoqarfik tallimanik allaffimmioqarpoq. Siulittaasoqarfimmi allaffimmiut tallimat Folketingimi ilaasortat akornanni qinerneqartarput, siulittaasoq siulittaasulluunniit tullersortaasa ilaat peqataasinnaanngippat Folketingimi ataatsimiinnernik aqutsisarput. Aammattaaq siulittaasoqarfimmi allaffimmiut elektroniskimik qinersinerit atorneqanngikkaangata qinersisarnermi ikiuuttarput, inatsisillu akuersissutigineqartut Folketingimi siulittaasoq peqatigalugu atsiortarpaat.

Ilaasortat ukua siulittaasoqarfimmi allaffimmiutut atorfeqarput:

• Birgitte Vind (S)
• Bjarne Laustsen (S)
• Erling Bonnesen (V)
• Theresa Berg Andersen (SF)
• Jeppe Søe (UFG)

Siulittaasup siulittaasullu tullersortaasa Folketingip inersuani ataatsimiinnerit aquttarpaat

Siulittaasup, Folketingip inersuani ataatsimiinnerit siulittaasup issiavianiit aquttarpai, isumaqatiginninniarnerillu pitsaasumik torersumillu ingerlanissaat qulakkeerlugu. Folketingimi ilaasortat imminnut hr.-imik aamma fru-mik taagortussaapput, oqaasipiloqqusaanatillu. Siulittaasup siulittaasullu tullersortaasa siulittaasup issiaviani piffissaq tulleriiaarlutik atortarpaat.

Folketingip aaningaasartuutissatut naatsorsuutinut siunnersuutai siulittaasoqarfiup suliarisarpai

Folketingip aningaasartuutissatut naatsorsuutinut siunnersuutai siulittaasoqarfiup suliarisarpai, Suleriaatsimullu ataatsimiititaliamut innersuummik saqqummiussilluni. Taamaalilluni ataatsimiititaliap aaningaasartuutissatut naatsorsuutinut siunnersuut akuerissavaa naalakkersuisunullu nassiullugu.

Ukiumi naatsorsuiffiusumi siulittaasoqarfik Folketingip naatsorsuutaanut atatillugu ilassutitut aningaasaliissutinik aalajangiisinnaavoq, soorlu aamma nuna tamakkerlugu Aningaasaqarnermut Ataatsimiititaliaq aalajangiisinnaasoq.