Naalagaaffiup kukkunersiuisui
Naalagaaffiup naatsorsuutaanik nalilersuinissaq Naalagaaffiup kukkunersiuisuisa suliassaraat. Inatsit tunngaviusumi tamanna aalajangersarneqarsimavoq.
Naalagaaffiup kukkunersiuisuisa naalagaaffimmi suliffeqarfinnilu akileraartartunit aningaasat pitsaasumik, iluaqutaasumik sipaarniartumillu inatsisit naapertorlugit atorneqartarnersut misissortarpaat. Taamaaliortarput naalagaaffiup naatsorsuutai misissoqqissaarlugit.
Akileraarutit akitsuutillu akileraartartunit akiliutigineqartut tamarmik – naalagaaffiup isertitai – naatsorsuutini eqqortumik allanneqarsimanersut misissortarpaat. Aamma aningaasartuutit tamarmik naatsorsuutini allanneqarsimanersut misissortarpaat minnerunngitsumillu aningaasanik atuinerit Folketingimit aalajangersarneqarsimasunut naapertuunnersut misissortarlugit.
Naalagaaffiup kukkunersiuisuisa nalilersuinertik pillugu Folketingi ministereqarfiillu attuumassuteqartut ilisimatittarpaat.
Naalagaaffiup kukkunersiuisui arfinillit Folketingimi partiinit toqqarneqartarput.
Naalagaaffiup kukkunersiuisui Naalagaaffiullu aningaasartuutaanik kukkunersiuisut qanimut suleqatigiipput
1976-ip tungaanut Naalagaaffiup kukkunersiuisui kisimiillutik kukkunersiuisarsimapput, taamanili Folketingi aalajangersimavoq Naalagaaffiup aningaasartuutaanik kukkunersiuisut pilersinneqassasut. Ullumikkut Naalagaaffiup aningaasartuutaanik kukkunersiuisut namminneq kukkunersiuisarput, taakkulu Naalagaaffiup kukkunersiuisuisa nalilersortarpaat.
Taamaalilluni Naalagaaffiup aningaasartuutaanik kukkunersiuisut suliaat Naalagaaffiup kukkunersiuisuisa politikkikkut naliliinerannut naalagaaffiullu aningaasaataanik atuineq pillugu isornartorsiuisarnernut tunngaviusarput.
Nalunaarusiat tamarmik tamanut saqqummiunneqartarput
Naalagaaffiup kukkunersiuisuisa aamma Naalagaaffiup aningaasartuutaanik kukkunersiuisut nalunaarusiaat tamanut saqqummiunneqartarput. Allakkiat ministerit, Naalagaaffiup kukkunersiuisuisa aamma Naalagaaffiup aningaasartuutaanik kukkunersiuisut Folketingillu suliamik nangitsinerinut tunngasut aamma takuneqarsinnaapput. Allakkiat suliamut tunngasut tamarmik Danmarkimi Naalagaaffiup kukkunersiuisuisa nittartagaanni takuneqarsinnaapput.
Allagaatit tamanut saqqummersinneqarneranni naalagaaffiup naatsorsuutaanik kukkunersiuinerup sapinngisamik ammasumik ersarissumillu ingerlanneqarsinnaanissaa anguniarneqartarpoq.
Naalagaaffiup kukkunersiuisuisa sulinerat pillugu nittartagaanni danskisoortumi paasisaqarnerusinnaavutit