Naalagaaffiup aningaasartuutaanik kukkunersiuisut

Naalagaaffiup aningaasartuutaanik kukkunersiuisut, Danmarkimi inatsisartoqarnermik nakkutilliinermut atatillugu naalagaaffiup naatsorsuutaanik kukkunersiuisarput.

Større

Naalagaaffiup aningaasartuutaanik kukkunersiuisut Folketingip ataani atorfeqarfiuvoq attuumassuteqanngitsoq, tassani naalagaaffiup naatsorsuutai eqqortuunersut naalagaaffiullu aningaasaataasa Folketingip aalajangiussimasaanut atorneqartarnersut misissorneqartarput. Naalagaaffiup aningaasartuutaanik kukkunersiuisut suliaannut siunertaq tassaavoq:

  • pisortat naatsorsuutaannut tatiginninnerup nukittorsarnissaa
  • pisortat aningaasaataannik inatsisartoqarnikkut nakkutilliinermut tapersiinissaq
  • aqutsinermut tunngatillugu innuttaasut paasisimasaannik annertusaaneq tatiginartumillu paasissutissiisarnissap qulakkeerneqarnissaa
  • aqutsinermi akisussaassuseqarnerup qulakkeernissaa paasisanillu nutaanik aqqutissiuussinermi tunngaveqarluartunillu siunnersuuteqartarnikkut pitsanngorsaanerup siuarsarnissaa

Naalagaaffiup aningaasartuutaanik kukkunersiuisut suliassai pingaarnerit tassaapput:

  • naalagaaffiup naatsorsuutaanik misissuineq
  • naalagaaffiup aningaasaataanik aqutsinerup atuinerullu misissornissaa

Naalagaaffiup aningaasartuutaanik kukkunersiuisut namminneq aalajangertarpaat suut misissugarissanerlugit, namminersornissarlu Naalagaaffiup aningaasartuutaanik kukkunersiuisut suliaanni qitiusumik inissisimavoq. Naalagaaffiup kukkunersiuisuisa kisimik Naalagaaffiup aningaasartuutaanik kukkunersiuisut piumaffigisinnaavaat, susassaqarfimmi aalajangersimasumi misissueqqissaarnissap aallartinneqarnissaa.

Naalagaaffiup aningaasartuutaanik kukkunersiuisoq ataasiinnaavoq. Naalagaaffimmi kukkunersiuisoq atorfiliuvoq Naalagaaffiullu aningaasartuutaanik kukkunersiuisuni ulluinnarni aqutsisuulluni.

Naalagaaffiup aningaasartuutaanik kukkunersiuisut naalagaaffiup naatsorsuutai tamakkerlugit kukkunersiortarpai

Aningaasaqarnermut Naalakkersuisoqarfiup ukiut tamaasa danskit naalagaaffiannut naatsorsuutit tamakkerlugit suliarisarpai. Nunami ministereqarfinnit tamanit naatsorsuutit tunngavigalugit naatsorsuutit suliarineqartarput. Isertitat aningaasartuutillu naalagaaffiup naatsorsuutaani ilanngunneqartut Naalagaaffiup aningaasartuutaanik kukkunersiuinerit kukkunersiorneqartarput.

Naalagaaffiup aningaasartuutaanik kukkunersiuisut suliffeqarfiit atorfeqarfiillu arlallit naalagaaffiup naatsorsuutaasa avataaniittut kukkunersiortarpaat, aningaasartuutaat imaluunniit amigartoorutaat naalagaaffiup tapiissutaanit, aningaasaliissutinit imaluunniit isertitanit allanit matussuserneqartarmata. Ass. DR aamma DSB.

Naalagaaffiup aningaasartuutaanik kukkunersiuisut naalagaaffiup naatsorsuutai aqqutigalugit Danmarkip EU-mit pisartagaanik EU-mullu tapiissutigisartagaanik kukkunersiuinerit akisussaaffigai.

Naalagaaffiup aningaasartuutaanik kukkunersiuisut nunap immikkoortuini misissuinernik ingerlatsisarpoq

Naalagaaffiup aningaasartuutaanik kukkunersiuisut nunap immikkoortuisa tallimat naatsorsuutaat, nunap immikkoortuini kukkunersiuisut suliarisimasaannik misissuinissaminnut periarfissaqartarput, soorlu aamma Naalagaaffiup aningaasartuutaanik kukkunersiuisut nunap immikkoortuini annertuumik misissuisartut.

Kommunip susassaqarfiinut atatillugu Naalagaaffiup aningaasartuutaanik kukkunersiuisut, kommunit naatsorsuutaasa ilaat naalagaaffimmit taarsigassarsisitsinermik tamakkiisumik ilaannakortumilluunniit matussuserneqartut misissortarpai.

Naalagaaffiup aningaasartuutaanik kukkunersiuisut kukkunersiuinermut atatillugu ingerlatsivinnut siunnersuisarlunilu ilitsersuisarpoq, ass. ingerlatsiviup iluani nakkutilliineq qanoq pitsanngorsarneqarsinnaanersoq pillugu.

Naalagaaffiup aningaasartuutaanik kukkunersiuisut aamma Naalagaaffiup kukkunersiuisarfiisa akornanni suliassanik agguataarineq

Naalagaaffiup aningaasartuutaanik kukkunersiuisut kukkunersiuisarput, suliallu inerneri Naalagaaffiup kukkunersiuisarfiinut nalunaarusiarisarlugit. Naalagaaffiup kukkunersiuisuisa nalunaarusiaq pillugu oqaaseqaateqartarput nalunaarusiarlu Folketingimut tunniuttarlugu.

Nalunaarusiaq Folketingimut tunniunneqareeraangat, kingusinnerpaamik qaammatit sisamat qaangiutsinnagit ministerip pineqartup nalunaarusiami ajornartorsiutit saqqummiunneqartut nassuiartarpai. Taava Naalagaaffiup aningaasartuutaanik kukkunersiuisut ministerip nalunaarusiaanik nangitsisarpoq Naalagaaffiullu kukkunersiuisuinut oqaaseqaasiorluni. Uani marlunnik pisoqarsinnaavoq:

  • Naalagaaffiup aningaasartuutaanik kukkunersiuisut suliap matuneqarnissaa innersuutigisinnaavaat
  • Naalagaaffiup aningaasartuutaanik kukkunersiuisut suli suliassaqarneranik imaluunniit isornartorsiugassanik nassaarsinnaapput, taakkulu ingerlateqqinneqassapput
Naalagaaffiup kukkunersiuisuisa suliaannik paasisaqarnerugit