Christiansborgi suliffittut
Christiansborg Sloti folketingimi ilaasortanut, partiini sulisunut, atorfilinnut tusagassiortunullu suliffiuvoq.
Folketingimi ilaasortat 179-it Christiansborgimi ingerlanneqartuni tamani qitiusumiipput. Ataatsimiinnerni amerlasuuni peqataasarput, aammali allaffimmi sulineq nalinginnaasoq folketingimi ilaasortap ulluinnarni inuuneranut ilaavoq. Tusagassiuutinit, kattuffinnit innuttaasunillu apeqquteqaatit akineqartarput, siunnersuutinullu ataasiakkaanut allakkiat amerlanersaat misissoqqissaarneqartarlutik. Taamaattumik folketingimi ilaasortat ataasiakkaat Christiansborgimi allaffissaqartinneqartarput.
Folketingip allaffissornera
Folketingip allaffissornerani sulisut 480-it missaanniipput. Pingaarnertut suliassaraat folketingimi ilaasortat Folketingip inersuani ataatsimiititalianilu politikkikkut sulinerminni sinaakkutissaannik pilersitsinissaq. Ass. allaffeqarfiit eqqiluitsuunissaat, IT-systemit pitsaasumik ingerlanissaat inatsisartunilu oqaluuserisanit imaqarniliat sukumiisut pissarsiarineqarsinnaanissaat Taamaattumik Folketingip allaffissornerani ilaatigut asaasut, inatsisilerituuni allaffimmiut atuagaatilerisullu atorfeqarput.
Folketingip siulittaasua tassaavoq Folketingip aqutsisoqarfiani pisortaq qullersaq. Aqutsisoqarfik assigiinngitsunik 17-inik immikkoortortaqarpoq, tamarmik immikkut atorfilinnik suliassalinnillu. Immikkoortortat siulersuisut ataanni aaqqissuunneqarput, tassanilu Folketingimi pisortaq siulersuisullu tullersortaat marluk ilaasortaapput.
Tusagassiuutit
Folketingimi tusagassiorfiit aaqqissuisuinut allaffeqarfiit allallu neqeroorutaapput, tusagassiortullu, assiliisartut teknikkerillu 180-it missaat Folketingimi ulluinnarni suliffeqarput.
Folketingimi ilaasortat ilaasa tusagassiuutit piffissaq tamakkerlugu malinnaasarnerat ajornakusoortittarpaat, kisiannili aamma tusagassiuutinit sammineqarnissartik soqutigisaralugu. Tusagassiuutitigut sammineqarneq pisariaqarpoq, taamaalillutimmi folketingimi ilaasortat isumassarsiatik isummatillu inuiaqatigiinnut ingerlateqqissinnaasarpaat. Taamaattumik tusagassiorfinnut ilaasortanut nammineerlutik piumassutsiminnik saaffiginnittarput.