Kalaallit Nunaat pillugu ataatsimiititaliap sulinera, suliassai akisussaaffiilu

Kalaallit Nunaanni Namminersorlutik Oqartussat susassaqarfiit amerlanersaat oqartussaaffigilernikuuaat. Susassaqarfiit ataasiakkaat, soorlu nunanut allanut, illersornissamut isumannaallisaanermullu politikki, inatsisitigut aamma nunap aningaasaanut aningaasaqarnermullu politikki, suli naalagaaffimmi oqartussanut atassuteqarput, tassa Danmarkimi naalakkersuisunut Folketingimullu.

Tassunga atatillugu Kalaallit Nunaat pillugu ataatsimiititaliaq susassaqarfinni marlunni suliassaqarpoq:

• Susassaqarfinni Namminersorlutik Oqartussanit tiguneqarsimanngitsuni, Kalaallilli Nunaannut taamaallaat atuuttussani, imaluunniit Kalaallit Nunaannut immikkut pingaaruteqartuni inatsisissatut aalajangiiffigisassatullu siunnersuutit suliarineqarnerat
• Politikkimik ingerlanneqartumik inatsisartuni nakkutilliisarneq

Kalaallit Nunaat pillugu ataatsimiititaliaq Kalaallit Nunaanni pissutsinut malinnaasarpoq, taassuma ataani suliassanut EU-mut tunngasunut. Ass. danskit isumannaallisaanermut illersornissamullu politikkianni Kalaallit Nunaata inissisimaneranut, imaluunniit Kalaallit Nunaata kalaallillu nioqqutissiaasa EU-mi niuerfinnut eqqunneqarsinnaanerinut apeqqutinut.

Kalaallit Nunaat pillugu ataatsimiititaliami suliassat pingaarnerit ilagaat inatsisit nunatsinni atuuttut naalakkersuisunit qanoq aqunneqarnerannik nakkutilliineq. Ataatsimiititaliami ilaasortat oqaatsitigut imaluunniit allakkatigut immikkoortoq 20-mik apeqquteqarnerisigut, ataatsimiititaliami ataatsimiinnermi apeqquteqarnikkut, siunersioqatigiinnermi apeqquteqarnikkut imaluunniit ministerinut attuumassuteqartunut apeqquteqarnikkut inatsisartoqarnikkut nakkutilliisoqartarpoq.

Takuniaaneq

Kalaallit Nunaat pillugu ataatsimiititaliaq ukiut allortarlugit Kalaallit Nunaannut takuniaasarpoq. Kalaallit Nunaanni nunap immikkoortuini assigiinngitsuni ataatsimiititaliami ilaasortat paarlakaallutik tikeraartarput. Angalanerit taakku ataatsimiititaliami ilaasortanut ilisimasanik pingaarutilinnik isumassarsiornernillu pissarsiaqarfiulluartarput.

Issittumi ataatsimeersuarnernut peqataanerni - ass. Arctic Frontiersimi aamma Arctic Circlemi - ukiuni kingullerni Issittumi Kalaallillu Nunaanni pissutsinut nunat tamalaat akornanni soqutiginninnerulernerup malinnaaviginissaanut ataatsimiititaliami ilaasortat periarfissinneqartarput.

Kalaallit Nunaat pilluguataatsimiititaliap ministeriaqarfia

Statsministeriaqarfik tassaavoq Kalaallit Nunaat pillugu ataatsimiititaliap politikkikkut susassaqarfia. Tamaat isigalugu Kalaallit Nunaanni namminersorneq pillugu aaqqissuussineq statsministeriaqarfiup ataaniippoq.

Kalaallit Nunaanni pissutsinut apeqqutit, ministereqafiup attuumassutillip suliassaqarfiisa ataaniipput. Ass. Kalaallit Nunaanni politiit eqqartuussiveqarnerlu pillugit apeqqutit Inatsisinut ministeriap akisussaaffigai.