Folketingip allaffeqarfiata inunnut paasissutissat suliatsinnut pisariaqartut taamaallaat suliarisarpai. Suliassat suuneri apeqqutaatillugit inunnut paasissutissat katersorneqartarput nalunaarsorneqartarlutillu.
4.1. Isumannaallisaaneq isersinnaanerlu
Folketingip allaffeqarfia Folketingip iluani eqqaanilu sumiiffinni tamanut ammasuni, tv-kkut nakkutilliineq aqqutigalugu isumannaallisaasarput. Tv-kkut nakkutilliineq pillugu inatsimmi maleruagassat naapertorlugit nakkutilliineq pillugu allagartalersuisoqarsimavoq. Tv-kkut nakkutilliinermit immiussat isumaqatigiinngittoqarsimanngippat imaluunniit filmiliat politiinut tunniunneqarnissaannut pissutissaqanngippat ullut 30-t ingerlanerini piiarneqartarput.
Isumannaallisaaneq pissutigalugu Folketingip allaffeqarfiata oqarasuaatikkut oqaloqatigiinnerit nalunaarsorsinnaavai. Oqarasuaatikkut immiussat isumaqatigiinngittoqarsimanngippat imaluunniit filmiliat politiinut tunniunneqarnissaannut pissutissaqanngippat ullut 48-t ingerlanerini piiarneqartarput.
Folketingimi isumannaallisaaneq pissutigalugu pulaartut tamarmik Folketingimut apuunnermi isumannaallisaanermut skannerut aqqusaaqqaartarpaat soorlu aamma mittarfimmi taamaaliortoqartartoq.
4.2. Pulaarneq takornariartinneqarnerlu
Folketingi pulaarnissamut periarfissanik assigiinngitsunik neqerooruteqarpoq.
Folketingip nittartagaani ft.dk-mi inniminniisarfik aqqutigalugu imaluunniit Folketingip pulaartunut sullissivianut saaffiginninnikkut pulaarnissamut inniminniisoqarsinnaavoq. Atit, oqarasuaativit normua, e-mailit immaqalu suliffeqarfiit, atuarfiit peqatigiiffiilluunniit pillugit paasissutissat taamaallaat pisariaqartippagut.
4.3. Meeqqat atuarfiinit suliffeqarfimmik misiliineq
Meeqqat atuarfiini atuartut Folketingip allaffeqarfianut suliffimmik misiliinissaminnut qinnuteqarsinnaapput. Ft.dk-mi qinnuteqaammut immersugassami atuartut aqqi, najugaat, postnormui, illoqarfik, oqarasuaatip normua, atuarfik klassilu allanneqassapput.
4.4. Folketingimi suliffissat
Folketingip allaffeqarfiani atorfinnut inuttaqanngitsunut qinnuteqaatit Folketingip nittartagaa aqqutigalugit nassiunneqarsinnaapput. Naalagaaffiup elektroniskimik sulisussarsiortarfia atortarparput.
4.5. Spilli ilinniartitsinermoortoq
Folketingi meeqqat atuarfiini atuartunut spillinik assigiinngitsunik neqerooruteqarpoq. Tassunga atatillugu atuartut aqqi, atuarfiat klassillu kiisalu saaffiginnittut oqarasuaatikkut normui e-mailikkullu adressii pillugit paasissutissat katersorneqartarput. Spillernermut atatillugu atuartut "Ulloq ataaseq politikkeritut" peqataasussat assilisinneqassapput (portrætfoto). Assit ukiup atuarfiusup naanerani namminneerlutik nungutertarput.
4.6. Folketingip paasissutissiisarfia
Folketingi marlunnik paasissutissiisarfeqarpoq, taakkulu oqarasuaatikkut, chatikkut imaluunniit Folketingip nittartagaatigut saaffigisinnaavatit. Folketingimut inatsisissamut imaluunniit Christiansborgimut tunngatillugu apeqqutissaqaruit Folketingip paasissutissiisarfia saaffigisinnaavat. EU-mi sulineq imaluunniit EU-p iluani pisinnaatitaaffiit pillugit apeqqutissaqaruit Danmarkimi Folketingip EU-mut paasissutissiisarfianut saaffiginnissinnaavutit. Illit pillutit paasissutissat illit nammineq tunniussatit suliarisarpagut. Apeqquteqaatit akisinnaajumallugu amerlanertigut apeqqutit, atit immaqalu e-mailit taamaallaat pisariaqartippagut. Chateqatigigutsigut IP-adressit takusinnaavarput.
4.7. Folketingstidende
Folketingstidendemi suliat pillugit apeqqutissaqaruit Folketingstidendemut saaffiginnissinnaavutit. Illit pillutit paasissutissat illit nammineq tunniussatit suliarisarpagut. Apeqquteqaatit akisinnaajumallugu amerlanertigut apeqqutit, atit immaqalu e-mailit taamaallaat pisariaqartippagut. Apeqqulli Folketingimi paasissutissiisarfimmit pitsaanerusumik sukkanerusumilluunniit akineqarsinnaappata ingerlateqqissavarput.
Folketingimi paasissutissiisarfik aamma oqarasuaatikkut, chatikkut imaluunniit Folketingip nittartagaatigut toqqaannartumik saaffigisinnaavat. Immikkoortoq 4.6. qulaani takuuk.
4.8. Folketingimi atuisuuffeqarnermik aaqqissuussineq
Folketingip nittartagaatigut Folketingimit nutaarsiassanik allakkianillu pisartagaqalersinnaavutit. Atuisuuffeqalerniaruit profilimik pilersitsissaatit. Profilimiisinneqassapput atit, e-mailikkut adressit aammalu nutaarsiassat allakkiallu pisartagarilerusutatit pillugit paasissutissat.
Paasissutissat taakku IT-systemimi suliarisarpagut nutaarsiassat allakkiallu pisartagarilerusutatit nassiussinnaaniassagatsigit. Paasissutissat allanut ingerlateqqinneqassanngillat siunertanullu allanut atorneqassanatik. Nutaarsiassat allakkiallu pisartagatit pillugit paasissutissat ulluni 30-ni toqqorsimasarpagut.
Paasissutissat sorliit uagutsinnut tunniussimanerlugit ajornanngitsumik takusinnaavatit imaluunniit pisartakkatit allanngortissinnaavatit unitsillugilluunniit. Taamaaliorsinnaavutit profilivit pisartakkavillu ft.dk-mi takunerini, allanngortinnerini imaluunniit piiarnerini.
4.9. Folketingip nittartakkaminut aaqqissuisoqarfia aamma Folketingip webmasteria
Folketingip nittartagaata ilusilersorneqarnera pillugu imaluunniit pitsanngorsaanissamut siunnersuuteqaruit Folketingimi nittartakkamut aaqqissuisoqarfimmut saaffiginnissinnaavutit. Ft.dk-mi teknikkikkut kukkunernik nalaataqaruit imaluunniit allatut teknikkimut tunngasunik apeqqutissaqaruit Folketingimi nittartakkamut aaqqissuisoqarfik saaffigisinnaavat. Inunnut paasissutissanut tunngatillugu saaffiginnissutsit akisinnaajumallugu amerlanertigut atit immaqalu e-mailit taamaallaat pisariaqartippagut.
4.10. Tusagassiuutit
Politikkikkut sulinerup malinnaaviginissaanut innuttaasut pitsaanerpaamik atugassaqartinneqartussaapput. Taamaattumik tusagassiortutut imaluunniit assiliisartutut, tusagassiornermut korti atorlugu Danmarkimi Folketingimut isersinnaanissannut periarfissaqarputit. Pressekorti atuutissaguni Danmarkimeersuussaaq imaluunniit nunat tamalaat akornanni pressekortiussalluni. Pisuni immikkut ittuni, ass. qinersiviup unnuaani imaluunniit Folketingip ammarneqarnerani immikkut ittunik piumasaqaateqartoqarsinnaavoq. Immikkut ittumik akuersissuteqarnissamik piumasaqaateqartoqarpat ft.dk-mi atuarneqarsinnaassaaq. Tusagassiuutit immikkut pisinnaatitaaffillit annerpaamik 160-it Folketingimut isersinnaatitaasarput. Immikkut pisinnaatitaaffinnut piumasaqaatit isersinnaanissamut qinnuteqarnermi immersugassami atuarneqarsinnaapput. Folketingip allaffeqarfiani ateq, oqarasuaatip normua, e-mailimut adressi aamma sulisitsisoq nalunaarsorneqartarput.
4.11. Pisoqarnerani assilisat filmiliallu
Folketingi Danmarkimi atorfeqarfiuvoq napatitsisuusoq, inuiannullu pingaaruteqartuuvoq Christiansborgimi sulinerup inuunerullu siammarterneqarlunilu uppernarsaasiorfigineqarnissaa. Folketingip allaffeqarfiata Folketingimi pisut aaqqissuussat ilaatigut filmiliarisarpai assilisarlugillu. Ilaatigut siunertaavoq Folketingip suliaanik oqaluttuarnissaq, kiisalu assit filmiliallu kinguaariinnut tulliuttunut uppernarsaatitut toqqortaatigineqarnissaat.
4.12. Cookies:
Cookiesinik atuineq pillugu ft.dk-mi aamma eu.dk-mi atuarsinnaavutit.
Cookiesinik atuineq pillugu folketingstidende.dk-mi atuarsinnaavutit.
Cookiesinik atuineq pillugu folketingi.dk-mi atuarsinnaavutit.
- Cookiesit pillugit nalunaaruteqarneq
4.13. Internetimik atuinermik nalunaarsuineq
Folketingip allaffeqarfiata Folketingip nittartagaanik atuineq nalunaarsortarpaa. Kisitsisit atorlugit nalunaarsuineq aamma atuisut misigisaasa pitsanngorsarneqarnissaat siunertaralugu nalunaarsuisoqartarpoq.
4.14. Folketingip IT-systemiisa iluanni atuisunut paasissutissiineq
Folketingip allaffeqarfiani inunnut paasissutissat suliarineqartarnerat pillugu Folketingip IT-systemiisa iluanni atuisunut immikkut paasissutissiisoqartarpoq.